Sunday, June 27, 2010

بحبك بصوت عالي

اسم التصميم
"كـــان زمــان"
بحبك بصوت عالي عالي يا شجرة توت وضلة عنبايا
بحب صوت أدان فجرك وبحب أحسك ساكنة جوايا
ظلمناكي هجرناكي وقلنا وعدنا عليكي أبوخ حكاية
بننهش في بعض ونقرقش عظامك ونتمطع قوي في عتابك
الذمب مش ذمبك السبب ولادك يبانوا مظلومين وهما ذئابك
جلاليب ولا بدل التوب بقى واسع وأسهل حاجة يلعنوا ترابك
يا قاهرة المعز الصوت بقى للحلنجي واللي بيعرف بيهز
واللي بفلوسهم غصب عنا يمثلونا ومزهقوش من أكل الوز
ونشوف كل يوم كرافته تطلع تقول أحمدوا ربنا أنتم في عز
قالوها زمان أجمل بلد ودلوقتي بيتلعن كل اللي فيها أتولد
كان حلواني اللي بانيها ومعمر فيها ودلوقتى يحيا أبو الهدد
نتنفس ونشرب وناكل أية وكل اللي علينا نحلم ونستني المدد
منديل بؤية وملاية لف وبرج حمام حولية الحمام يلف
أيام تروح وتيجي غيرها ونلاقي الهدوم كل يوم تخف
أنتي فمكانك وأحنا في مكانا وجية الدور على نيلك يجف
كتير هوكي بيتمشوا في شوارعك وحوريكي يشموكي
وكتير موهومين بيكرهوكي يلعنوا كل يوم ويشتموكي
ناسين جشعهم ناسين طمعهم وفاكرين بس يظلموكي
جنية يعوم كل شوية ويتبهدل وكذا مرة حالة يتقندل
نقول هنصلح بعلو صوتنا نلاقي لسانا ورى قوتنا مدلدل
وكلمة حضارة لبانة فبقنا والحقيقة غايبة أمتى بقى نتعدل
يا بلدي يا أحلى الأحلام مستني نرجع تاني زي زمان
يا بلدي يا أحلى غرام يا سلام وحضن دافي ريحتة امان
بحبك بصوت عالي عالي عالي وقبلي كتير حبوكي زمان
----------------------------
تصميم سيد سعد
----------------------------

13 comments:

فاتيما said...

يااااااااه

صعب قوى التصميم دا يا سيد !!


معرفش ليه محستش انه شبه العنوان اللى فكرنى بغنوة منير اكيد
و بحبها جدااااا

تعرف الغنوة دى
بتجى ف بالى معاها حد واقف ف بلكونة فى ليلة قمر اربعتاشر و باصص للسما و شايف القمر منور ...يمكن عشان خيالى كدا مش حاسة ان التصميم فيه حب

هوه فيه حد مستخبى

حب ف الدرا و الخفاء يمكن ؟!!

يمكن


بص بعد شوية كدا
الواحد يحس بألفة فيه


انا من هواة اللون الأسود عموما
و الشكل ضبابى شوية و الضباب اصله سينتمنتل ع الآخر و بيدى جو رومانسى برضو

انا هشعر و هيطلع الشكل عاجبنى ف الىخر و اقولك امسح كل اللى فوق دا ؟!!!!
ههههههه

اما نشوف الكلمات المصاحبة
و نقول تااااااااانى

انتا غبت شوية
و افتقدناك
بس العود مكسرات
يا سيد المكسرات

تحياتى و خالص ودى ليك

dr.Roufy said...

آه
:(
كان زمان
التصميم فعلا مؤلم جدا صديقي
درجة اللون والاضاءة والخط
والتسمية
كل شئ كل شئ
بيبوح بوجع وعشق بلا نهاية

أحييك
:)

hana said...

مش عارفة ليه حاسة التصميم كأنه
بيقول كان زمان الحب مالي القلب
ليكي بس راح لنهار ومبقاش غير الألم
مش عارفة ليه حسيت كدة

وكأنك بتقول

كان زمان أحبك بصوت عالي

تحياتي للإحسآآس الجمييل

فاتيما said...

اسفة ع التأخير

بس بعد اللى مكتوب دا
انا تراجعت عن رأيى
كنت فاكرة الحالة عاطفية ف اتجاه
و طلعت ف إتجاه تانى

كدا تبقى لايقة
لن الحال موجع
غامض
ضبابى
موحش
بس فيه نقاط مضيئة برضو

عسل اسود
على حد عنوان الفيلم


تحياتى ليك يا سيد المكسرات
و يا فنان يا جميل

حسن ارابيسك said...

الصديق / سيد
الحقيقة المدونة اصبح لها رونق جميل ومميز وساحر
وتدويناتك أو اشعارك الأخيرة تغيرت من أجل لأجمل اليوم اشعارك تحمل رائحة لمفردات شعبة وتراثية جميلة يمكن لفترة سابقة ولكنني مثلا عندما قرأن منديل بؤيية وملايه لف على الفور استدعت ذاكرتي لوحات الرائع الراحل الفنان التشكيلي محمود سعيد وبالأخص لوحة بنات بحري وهذا ما اعتقدته انك كنت تحت تأثيرها وانت تكتب تلك التدوينة الرائعة
ولوحتك التعبيرية رائعة ولكنها في سكة وقصيدتك في سكة تانية
المهم انني في النهاية استمتعت هنا كعادتي
تحياتي
حسن أرابيسك

SAYED SAAD said...

فكرة تصميم كان زمان
اعتمدت على الوان الابيض والاسود حتى اتجرد من معانى كل الالوان ولكي اركز فقط على اظهار واقع نعيشة فكان التصميم عبارةعن خريطة لمصر تحمل اسمها واسم محافظاتها كخلفية توشك على الزوبان يحيطها قلب ملتهب من النيران يضم معها بيوت ومآذن القاهرة المحروسة ، هدفى هو التعبير عن الحال الذي وصلت اليه مصر هي وشعبها

ولهذا كان اسم البوست احبك بصوت عالي لأنه اصبح عدد كبير من الذين يعيشون فيها يأخذون خيرها وينهبوها ثم في اخر الامر يلعنوها مختصر الامر نعيب في مصر والعيب فينا

SAYED SAAD said...

فاتيما
فعلا هو مش حب هو حصرة على حب لبلد حاسس انه اتحول عند كتير لكرة
الغنوه طبعا تحفة وصوت منير من الاصوات اللي ليها مكانه خاصة عندي
تعرفي يا فتيما
اجمل حاجة قولتيها احساسك بالالفة بعد شوية في التصميم عارفة ليه لأن في حاجة بينك وبين التصميم مشتركة قلبك اللي خد باله منها وهي ان التصميم عن مصر وانتى مصرية قوي وده سبب الالفة

بالعكس انتى حسيتى التصميم قوي وبجد احيكي على التمعن الجميل ده

سعيد بجد بكي وبية
اتمنى دائما وجودك صديقة عزيزة للمكسرات

كونى بخير دائما
سيد سعد

SAYED SAAD said...

روفي الصديقة العزيزة

هو فعلا مؤلم اصبتى وهذا ليس بالغريب على مبدعة

كوني بصحة وخير
سيد سعد

SAYED SAAD said...

هنونة فنانة المستقبل القريب

فعلا يا صديقتى كان زمان الحب مالي القلب ودلوقتى بقى مكانة كره للأسف من ظلم ناس كتير لبلد عاشين فيها كل همهم يعلقوا اخطأئم على شماعتها

كونى سعيد دائما
سيد سعد

SAYED SAAD said...

فاتيما
انتى مش في اتجاه تانى ولا حاجة انتى بس خوفتى لا تكوني غلط لاكن احساسك كان سليم وصادق مائة بالمائة

كونى بخير
سيد سعد

SAYED SAAD said...

اربيسك

اشكرك على اطرائك بخصوص المدونة وما اكتوبة وايضا على تذوقك، لكنى اعتقد تلك المرة لم يكن لديك الوقت الكافي لتحلل موضعي ورسمي كما تعودت منك
لأن النص والتصميم ليس لها علاقةاطلاقا بالفنان محمود سعيد
انما المشترك منهم هو ما نعلقة من اخطاء على شماعة اسمها مصر اتمنى ان احظي بوقت كافي المرة القادمة كما تعودت منك
كون بخير
سيد سعد

العيسوى الصغير said...

والله كلنا بنحبها مش انت بس

SAYED SAAD said...

العيسوي الصغير

اولا كل سنة وانت طيب ورمضان كريم
واهلا بيك على صفحات المكسرات
اتمنة الدوام